कुवेत – कुवेतवासी तामाङ समुदायले सोनाम ल्होछार २८६२ महान सांस्कृतिक उत्सवको रुपमा भव्य कार्यक्रम आयोजना गरि मनाएका छन ।
नेपाल तामाङ घेदुङ कुवेतले मञ्जुश्री संवत् २८६२ ता ल्हो (घोडा वर्ष) को अवसरमा आयोजित कार्यक्रममा चर्चित अतिथि कलाकार आस्मान लोप्चन, लक्ष्मी स्याङ्तान तामाङ र रिजन थिङ लामासहित स्थानीय कलाकारहरूको मनमोहक सांगीतिक प्रस्तुति रहेको थियो ।
जिलिवस्थित एस्पायर इन्डियन स्कूलको सभाहलमा १३ फेब्रुअरी २०२६ शुक्रबार सम्पन्न उक्त सांगीतिक कार्यक्रमले कुवेतको चिसो मौसमलाई तताएको थियो । साँस्कृतिक उत्सव कार्यक्रममा तामाङ समुदायको मौलिक संस्कृति, नृत्य र तामाङ जातिको परम्परागत रुपमा प्रयोग हुँदै आइरहेको भेषभुषा, बाजागाजा प्रदर्शन गरिएको थियो ।
कार्यक्रमको अध्यक्षता पेमा लामाले गरेका थिए भने नेपाली दूतावास कुवेतका राजदूत घनश्याम लम्सालको प्रमुख आतिथ्यता रहेको थियो । त्यस्तै एनआरएनए कुवेत, नेपाल पत्रकार महासंघ कुवेत र नेपाल आदिवासी जनजाती महासंघ कुवेतका प्रतिनिधिहरूको पनि सहभागिता रहेको थियो । कुवेतमा रहेका विभिन्न नेपाली संघ-संस्थाका प्रतिनिधि, समाजसेवी, बुद्धिजीवी, पत्रकार र कलाकारहरू लगायत तामाङ र गैर तामाङको उल्लेख्य उपस्थिति थियो ।
