काठमाडौं महानगरपालिकाका मेयर बालेन शाहले सिंहदरबारमा आगजनी हुँदा दमकल नपठाएको आरोपबारे प्रस्टीकरण दिएका छन्।
उनले गलत आरोप फैलाउनेहरूलाई एकमुष्ट रूपमा सम्बोधन गर्दै आन्दोलनकारीले रोक्दा दमकल जान नसकेको बताएका हुन्। उनले यसबारे सूचनाको हक प्रयोग गरी जानकारी लिनसक्ने पनि बताएका छन्।
उनले अहिले देशलाई एकता र साँचो कुराको खाँचो रहेको बताएका छन्।
‘सिंहदरबार जलेको लगत्तै दमकल जाने प्रयास गरेता पनि आन्दोलनकारीको अवरोधले गर्दा दमकल जान सकेको थिएन, नेपाली सेनाको दमकल सिंहदरबार भित्रै हुँदा पनि निभाउने प्रयास गर्न सकेको थिएन, कारण थियो हुलले दमकललाई काम गर्न नदिएको जब भीड अलिक शान्त हुने बित्तिकै २४ गते साँझ ८:१५ भित्रै काठमाडौं महानगरको दमकल त्यहाँ पुगेको थियो,’ उनले लेखेका छन्।
उनले काठमाडौंसँग भएका दमकलबारे पनि जानकारी दिएका छन्।
काठमाडौं महानगरको न्यूरोडमा २ वटा, बालाजुमा २ वटा र रामहिटी मा १ वटा गरी जम्मा ५ वटा दमकल सञ्चालनमा रहेका छन्। १४ जना नगर प्रहरी र ३० जना सशस्त्र प्रहरी गरी जम्मा ४४ जनाको टिमले ३ सिफ्टमा काम गर्नुहुन्छ, १ सिफ्टमा १ दमकल मा बढीमा ३ जना मात्र जनशक्ति मार्फत दमकल संचालन गरिएको छ,’ उनले लेखेका छन्, ‘२३ गते केही स्थानमा र २४ गते सिंहदरबारमात्रै होइन, काठमाडौंमात्रै होइन, सिंगो देश जल्दै थियो। महानगर भित्र जुनसुकै संरचना जले पनि जोगाउने प्रमुख दायित्वबोध हामीले गर्नुपर्छ भन्ने हाम्रो मान्यता हो।’
Play
–
