काठमाडौं । कश्मीरको पहलगाम आक्रमणमा संलग्न स्थानीय आतंककारी आदिल हुसेन ठोकरको घरमा सुरक्षा बलले बम विस्फोट गराएको छ। आदिल ठोकर उर्फ आदिल गुरीको रूपमा पहिचान गरिएको आतंककारीमाथि पहलगामको बैसरन उपत्यकामा अप्रिल २२ मा भएको आक्रमणको योजना बनाउन र कार्यान्वयन गर्न आतंककारीहरूलाई सहयोग गरेको आरोप छ।
यस आक्रमणमा संलग्न अर्का स्थानीय आतंककारी आसिफ शेखको त्रालमा रहेको घर जम्मू कश्मीर प्रशासनले बुलडोजर प्रयोग गरेर भत्काएको छ। अप्रिल २२ मा जम्मू कश्मीरको पहलगाममा चार लश्कर-ए-तैयबा (एलईटी) आतंककारीहरूको समूहले हिन्दू पर्यटकहरूलाई लक्षित गरी गोली हानेको सेना स्रोतहरूले बताए।
यस आतंकवादी हमलामा २६ जनाले ज्यान गुमाए । जसमध्ये धेरैजसो पर्यटक थिए र भारतका विभिन्न राज्यहरूबाट जम्मू कश्मीर घुम्न आएका थिए। आतंककारीहरूमा दुई स्थानीय पनि सामेल थिए। स्रोतहरूले बताएअनुसार दुवै स्थानीय आतंककारीहरूको पहिचान बिजबेहरा निवासी आदिल हुसेन ठोकर र त्राल निवासी आसिफ शेखको रूपमा गरिएको छ।
सैन्य स्रोतका अनुसार आदिल २०१८ मा अटारी-वाघा सीमा हुँदै कानुनी रूपमा पाकिस्तान गएका थिए। पाकिस्तानमा रहँदा उनले आतंकवादी शिविरमा तालिम लिए र गत वर्ष जम्मू कश्मीर फर्किए। पहलगाम आक्रमणका केही प्रत्यक्षदर्शीहरूले केही आतंककारीहरू पश्तून भाषामा आपसमा कुरा गरिरहेको बताए।
आतंककारीहरू धेरै पहिले नै जम्मू कश्मीरमा घुसपैठ गरिसकेका थिए र उनीहरूको योजना अप्रिल १९ मा प्रधानमन्त्री नरेन्द्र मोदीको कटरा भ्रमणको क्रममा आक्रमण गर्ने थियो भन्ने विश्वास गरिन्छ ।मोदीको पूर्वनिर्धारित भ्रमण पछि रद्द गरिएको थियो ।
