रूँदै बनाएको भिडिओको चर्चा भएपछि यसो भन्छिन् एलिना,

गायिका एलिना चौहान यतिबेला थप चर्चामा छिन्। उनले मंगलबार सामाजिक सञ्जालमा पोस्ट गरेको एक भिडियोलाई लिएर उनको चर्चा भइरहेको हो।
एलिनाले ‘थारा पैसा थारी दौलत’ बोलको नयाँ हिन्दी गीतमा भिडिओ बनाएकी थिइन्। रूँदै भिडिओ बनाएकी उनको अनुहारमा नीलडाम देखिन्छ। ‘एक वास्तविक मानिसले पागल हुँदा पनि तपाईंलाई आदर गर्नेछ’ भन्ने क्याप्सनसहित उनले भिडिओ राखेकी थिइन्।
सो भिडिओलाई लिएर उनका कतिपय फ्यान एवं शुभचिन्तकले चासो व्यक्त गरेका थिए। 
कतिपयले एलिनाले अभिनय गरेको हुनसक्ने अनुमान गरे पनि केहीले श्रीमान–श्रीमतीबीच झगडा भएको हो कि भनेर समेत टिप्पणी गरेका थिए। भिडिओमा धेरैले के भयो भनेर प्रश्न सोधेका थिए।

भिडिओलाई लिएर अनेक खालका टिप्पणी भएपछि एलिनाले त्यसबारे बताएकी छन्। 

सामाजिक सञ्जालमा नयाँ भिडिओ राख्दै उनले भनेकी छन्, ‘टिकटकमा एउटा गीत धेरै देखिरहेकी थिएँ। त्यो गीत युट्युबमा गएर हेरेँ। एकदमै राम्रो लाग्यो। त्यसपछि एउटा कन्सेप्ट सोचेर त्यो गीतमा भिडिओ बनाएर राखेकी हुँ।’
भिडिओलाई लिएर अन्यथा नसोच्न र भ्रममा नपर्न एलिनाले आग्रह गरेकी छन्।
बैशाखमा बागलुङका विष्णु सापकोटासँग विवाह गरेकी एलिना अहिले श्रीमानसँग अष्ट्रेलियामा छिन्। छिट्टै नेपाल आउने उनले बताएकी छन्।